БелаВела: пра ровары — па-беларуску

Непраезная частка

2012-01-22T01:32:00.000+03:00

Зімой рэдкі дзень абыходзіцца без чыноўнікаў у навінах, якія расказваюць пра посьпехі ачысткі сталіцы ад сьнегу. І кожную зіму паўтараецца тая самая карціна: веладарожкі ня чысьціцца пераважна, ходнікі чысьцяцца ўрыўкамі.

Нягледзячы на дэклярацыі ўладоўцаў, роварная і пешаходная інфраструктура не ўспрымаецца як камунікацыйная і аддаецца занядбаньню пры першай нагодзе.

Глядзі яшчэ: Відэа леташняга фрырайду па Радыяльнай.

Канцэпцыю прыняць, дарожак не будаваць

2012-01-19T10:51:00.000+03:00

«Фэшэнэбэльная» веладарожка
ля Цнянскага вадасховішча

19 студзеня Onliner публікуе цытату чыноўніка з адміністрацыі Цэнтральнага раёну наконт будаўніцтва веладарожак:

«У нас былі гатовыя чатыры прапановы. Напрыклад, зрабіць веладарожку вакол вадасховішча. Альбо пракласьці яе ад Лагойскага да Даўгінаўскага тракту. Пачаўся нейкі рух. Мы хацелі здаць аб’ект да 2013 году. Але ў канцы 2011-га прыйшоў ліст за подпісам аднаго з намесьнікаў старшыні Менгарвыканкаму з указаньнем прыпыніць праектаваньне і будаўніцтва веладарожак у Менску».

Цікава, што акурат у канцы 2011-га была зацьверджаная «Канцэпцыя забесьпячэньня сыстэмы роварнага руху ў сталіцы».

Велапераезды на Незалежнасьці

2011-10-25T01:38:00.000+03:00

На праспэкце Незалежнасьці зьявіліся велапераезды!

Пераяжджаць, ня сьпешваючыся, можна цяпер пераходы зь сьвятлафорамі ад вуліцы Янкі Купалы да вуліцы Дарашэвіча па няцотным баку, ад Акадэмічнай да вуліцы Калініна па абодвух баках, ад Макаёнка да Філімонава па цотным баку. Ля Дарашэвіча і Калініна можна ня злазячы з ровара легальна пераехаць праспэкт. Бяз роварных пераездаў засталіся вуліца Кісялёва і Броўкі, ~~завулак Кузьмы Чорнага і выезд з Чырвонай вуліцы ля мастацкай галерэі~~.

Кароткі спойлер

0:18 Велапераезд упіраецца ў слуп з нацягнутым ланцугом.
0:37 Фарбавальнікі пераблыталі арыентацыю трохкутніка, давялося адфарбоўваць назад.
1:16 Стрэлка рэкамэндауе ўразацца ў сьметніцу.
1:35 Цераз праезд да Камуністычнай і Кісялёва велапаласы няма.
~~2:20 На выезьдзе зь Якуба Коласа ля мастацкай галерэі велапаласы няма.~~
2:25 Праехаў за сьпіной ДПСьніка =)
2:47 Завышаны бардзюр і вадасьцёкавая рашотка на велапераезьдзе.
2:56 Усе, усе! ідуць па велапераезьдзе і ня думаюць збочваць + чарговы высокі бардзюр.
4:14 Рашотка + бардзюр-велікан, і рука ня дрогнула намаляваць велапаласу. Ідыятызм вышэйшай пробы.
~~4:30 Завулак Кузьмы Чорнага таксама безь велапераезду.~~
4:45 На вуліцы Калініна велапераезд мяняе арыетацыю і накрэсьлены з дальняга ад скрыжаваньня боку. Хоць акурат тут яго варта было зрабіць бліжэй да восі праспэкту, каб раварыстам не рабіць лішніх зігзагаў на вузкім ходніку вуліцы Калінна.
7:00 А класны МАЗ, праўда?
7:25 Гістарычны момант стварэньня менскай велаінфрастуктуры.
9:20 Дзеці на чырвонае дужа добра ўпісаліся ў сюжэт =)

КПпМ веластаянках. Талбухіна, 12А

2011-10-19T13:38:00.001+03:00

Колаўторквалка ля крамы «Турыст. Тавары для спорту і турызму». Карыстацца можна. З заходам сонца пагружаецца ў поўную цямрэчу.

Усе менскія веластаянкі

Ідэнтычная стаіць ля «Спорттавараў» на Якуба Коласа, 30. Сувязь між імі такая, што на Талбухіна — крама № 1, а на Якуба Коласа — № 4. Сьляды крамы № 2 страціліся ў часе і прасторы, а крама № 3 дагэтуль месьціцца на Прытыцкага, 42. Хто з тых краёў, там раптам гэткай трэцяй колаўторквалкі не паставілі?

Кароткі праваднік па менскіх веластаянках

Хацелі калідор — атрымалі кружку

2011-09-19T15:35:00.000+03:00

Кіраўнік Менску Мікалай Ладуцька летась сказаў, што падчас праектаваньня жылога раёну Шчомысьліца пры будаўніцтве транспартных разьвязак трэба прадугледзець калідоры для руху раварыстаў.

Сёлета праект мікрараёну быў адным з экспанатаў на выставе архітэктурных праектаў пад плошчай Незалежнасьці. Веладарожка на ім — жоўтым колерам.

Зробім шырэй:

Прызнацца, я ўяўляў калідор як велапраезд цераз кальцавую ў бок цэнтру, да якога зьбягаюцца з усіх шчомысьліцкіх вуліц веладарожкі. Тым больш што такі калідор ужо і гатовы — пешаходны пераход ля павароту на вёску Малінаўка.

Але, выглядае, свае транспартныя праблемы шчомысьліцкія веланавасёлы будуць вырашаць самі.

КППМ веластаянках. Першы менскі велагараж

2011-09-14T03:15:00.001+03:00

У Парку высокіх тэхналёгій на Купрэвіча, 1/1 зьявіўся велагараж. Роварам у ПВТ і так някепска жылося, а цяпер ім яшчэ зрабілі і першы ў Менску велагараж, як у Зялёным Бары. Цікава, ці будзе платным?

Дзякуй Zmitro Lapcionak за наводку.

КППМ веластаянках. Велазаводзкая, 7

2011-09-14T03:01:00.002+03:00

Брак і грошы на вецер. Стандартная колаўторквалка, на якой ровар вісіць на сьпіцах. Лепш чапляцца за агароджу ля ўваходу.

КППМ веластаянках. МЗОР

2011-09-14T02:20:00.001+03:00

Менскі станкабудаўнічы завод імя Кастрычніцкай рэвалюцыі, у якога адзін адрас з клюбам «Ньютон» — Кастрычніцкая, 16 — адбабахаў шыкоўную веластаянку. Што пра яе скажаш — люкс для ровара і разрыў шаблёну. Модны клюб ставіць няёмкую колаўторквалку, а завод — маднявы велашык.

Веластаянка ля Ньютона

2011-09-14T01:59:00.000+03:00

«НьюТон. Fashion. Art. Buffet» на Кастрычніцкай, 16 адкрыўся нядаўна і адразу абзавёўся веластаянкай. Веластаянкай з сэрыі «брак і грошы на вецер», ровар зь якой вывальваецца. Застаецца спадзявацца, што ў каве з апранахай ньютонаўцы разьбіраюцца лепей.

Кароткі праваднік па менскіх веластаянках

КППМ веладарожках. Лошыцкі парк

2011-09-14T01:31:00.001+03:00

Веладарожка ў Лошыцкім парку — сапраўднае дасягненьне беларускай веладарожкабудаўнічай школы. Гэта ня проста веладарожка зьніадкуды ўніадкуль, яна ў прынцыпе ня можа выкарыстоўвацца для асэнсаванага шляху хаця б на нейкай сваёй частцы. Калі ты, канечне, ня едзеш тапіцца.

Першая веладарожка ў вакуўме — створаная ў Беларусі. Ёсьць чым ганарыцца.

Няма сэнсу казаць, што мамы з каляскамі несумненна аддадуць перавагу каменнай крошцы перад веладарожачным асфальтам, што сам асфальт дзе-нідзе пакладзены насьпех і абы-як, што павароты залішне крутыя й бяз контраўхілаў, бо няма ніякага сэнсу гэтай дарожкай карыстацца. Калі на велапракаце не даюць ровары на 15 хвілін, ёй няма сэнсу карыстацца нават як атракцыёнам. Туды-назад — 10 хвілін. Далей што?

View Менскія веладарожкі in a larger map

Новае жыцьцё велапаласы на 2-м Роварным завулку

2011-09-14T01:07:00.000+03:00

Увішныя жыхары тутэйшых інтэрнатаў першыя даўмеліся прымаляваць да велапаласы пэрпэндыкулярныя лініі. Вуаля — лёгкім рухам рукі велапаласа ператвараецца ў аўтастаянку, адно што зь недарэчным роварчыкам на асфальце. Праўду кажучы, стаянка з гэтага ходніка не зьнікала нават тады, калі сохла фарба сьвежай велапалоснай разьметкі.

КППМ веластаянках, Пераходная, 64

2011-09-08T02:05:00.001+03:00

Ля прахадной тралейбуснага заводу аказалася нетрывіяльная колаўторквалка. Яна двухузроўневая — ніжні ўзровен вузейшы, ён ля самай зямлі, туды становіцца кола, а верхні прытрымлівае за раму ці пяро, як станеш.

Камэраў назірання не пабачыў, з будынка стаянка не праглядаецца. Затое міма начамі праяжджаюць самыя сьвежыя тралейбусы нашай краіны.

Дзякуй DziedMarozу за наводку

КППМ веластаянках. БДУшны апдэйт

2011-09-08T01:55:00.000+03:00

Вось табе трымценьнік на нач: пачварныя веласпарудзіны ля дворыка БДУ мала таго што самі па сабе вусьцішныя, дык яшчэ і перамяшчаюцца!

Цяперака гэтае іржавае страхоцьце стаіць поруч пад дрэвамі ля хімфака. Я набраўся сьмеласьці і ўваткнуў у яго ровар. І толькі адышоўся сфатаграфаваць, як ровар сасьлізнуў на бок і павіс на коле. Думаў, каюк колу, як на той велабаннай колазьнішчалцы, але не, гэтым разам пранесла.

А на велапаркінгу пад плошчай Незалежнасьці месцаў хіба не засталося?

Дзякуй DziedMarozу за наводку

КППМ веластаянках. Мясьнікова, 29

2011-09-07T01:28:00.000+03:00

Ажурная колаўторквалка зьявілася сёлета ля прыступак новай кавярні «Прыступкі». Здаля й не разьбярэш, за што там трымаецца гэты ровар, і здаецца, што расьце ён проста з кветніка.

Мяне, папраўдзе, ажурнасьць гэтая крыху трывожыць, але ровар на восьцы павісае не віхляючыся, у кавярні дзень сядзець ня будзеш, так што варыянт на паўгадзінкі прымальны. Да таго ж пакуль я фоткаў з суседніх дзьвярэй выйшаў на ганак паназіраць за мной вахцёр. Мо, ён так кожны ровар вартуе, хто ведае…

Праваднік па менскіх веластаянках

Дзякуй за наводку @kisa_anuta

КППМ веластаянках. Броўкі, 4 і 10

2011-09-03T01:52:00.000+03:00

Вуліца Петруся Броўкі стараньнямі БДУІР становіцца вуліцай Узорных Веластаянак. (Зробім выгляд, што не заўважылі страхоцьця на Броўкі, 6). А пра ўзорныя стаянкі і пісаць няма чаго.

Хаця вось ля 3-га корпусу цямрэча такая, што ніякая вытрымка фоціка не спраўляецца. Страшнавата кідаць ровар, па-шчырасьці.

Яшчэ адна такая веластаянка стаіць ля 5-га корпусу і яшчэ адно страхоцьце — ля 4-га.

Dziakuj za navodku, DziedMaroz.

КППМ веластаянках. Тэатар музкамэдыі

2011-09-03T01:33:00.000+03:00

Веластаянка за Тэатрам музкамэдыі на Мясьнікова, 44.

Колаўторквалка, якая хацела дарасьці да нармальнай веластаянкі, але не дала рады.

Кола ўваткнеш — ровар завальваецца на сьпіцы. Абаперціся рамай — шырыні з вышынёй малавата.

Асобная загадка — зь якога боку паркавацца: з правага, каб замінаць электраманцёрам, ці зь левага, каб аўтамабілям?

КППМ веластаянках. Уральская, 4

2011-09-03T01:26:00.000+03:00

Веластаянка ля прахадной Менскага электратэхнічнага заводу імя Казлова.

Колаўторквалка з вострымі краямі і зашырокай як для кола адлегласьцю між прутамі. Але калі ў мышэй ёсьць толькі кактус, то ўжо будзеш плакаць і калоцца, але…

Колаўторквалка быццам вісіць у паветры, а справа ў тым, што яе паклалі на сьценку, і цяпер язычкі з адтулінамі для мацаваньнья ўпіраюцца пэрпэндыкулярна ў плітку.

КППМ Веластаянках, Сьвярдлова, 14 (пл. Незалежнасьці)

2011-09-01T12:30:00.000+03:00

Па праўдзе, я і цяпер ня ўпэўнены, ці гэта веластаянка з кветнікам, ці проста кветнік з дэкаратыўнымі выгінамі, у якія я бесцырымонна ўваткнуў ровар. Калі гэта ўсё ж веластаянка, то нельга не адзначыць станоўчых зьменаў. Калі раней гэткія канструкцыі ўяўлялі зь сябе проста брак і выкінутыя на вецер грошы, то цяпер у іх можна кветкі хаця б пасадзіць. Зь іншага боку, калі мусова трэба зайсьціся ў тутэйшую краму, а працуе яна дапазна, то можна і да кветніка як небудзь злаўчыцца ды прычапіцца.

КППМВеластаянках. Галерэя «Ў»

2011-09-01T12:20:00.000+03:00

Як ля месца з такім прасунутым іміджам магло ня быць веластаянкі ад пачатку, я не разумею. Як не разумею, паводле якіх крытэраў выбіралася гэтая веластаянка а-ля сельпо. Не, ёй можна карыстацца. Хоць справа нават ня ў гэтым — проста ля галерэі «Ў», бару «Малако» і кнігарні «Логвінаў» — траіх у адным — цяпер нарэшце можна дзе кінуць ровар. Гэта плюс, і ўсё ж. І ўсё ж застаецца пытаньне, чаму з усіх магчымых варыянтаў веластаянак была выбрана колаўторквалка зь вяршыні чарту самых жахлівых прыстасаваньняў для чапляньня ровара.

Ходнікі поўныя нечаканасьцяў. Віцебск

2011-08-29T12:57:00.000+03:00

Савецкая вуліца, цэнтар Віцебску.

Велапаласа на Рафіева

2011-07-08T01:13:00.002+03:00

На Рафіева працягнулі велапаласу на 800 мэтраў. Радасьць та якая!

Высокія бардзюры падсыпалі, і цяпер на велапаласу можна ўсьцягнуць што-небудзь шырокае!

Асфальт і падсыпаныя бардзюры трымаюць камфортны хуткасны рэжым грунтовай дарогі — 15-20 км/г!

На вуліцы Рафіева застаўся яшчэ адзін адрэзак на 800 м., маляры для яго, няйначай, ужо рыхтуюцца малярнымі ПТВ краіны па мэтавым накіраваньні.

Кароткі праваднік па менскіх веладарожках

Велапаласа на Ясеніна (Рафіева — Слабадзкі праезд)

2011-07-08T00:54:00.002+03:00

На Ясеніна ад Рафіева да Слабадзкога праезду накрэсьлілі велапаласу. Нягледзячы на тое што паласа зьявілася пасьля ладнага перапынку і за новым старшынём выканкаму, яна абсалютна паўтарае ўсе заганы папярэдняга велакрэсьленьня. І таму на ёй ідзе сваё жыцьцё, вельмі далёкае, а часам абсалютна несумяшчальнае з раварысцкім.

Ходзяць пешаходы.

Выгульваюцца сабачкі.

Зьвісае проста ў твар гальлё.

Красуюцца машынкі.

Чакаюць транспарту шаноўныя пасажыры.

Пакрыцьцё велапаласы аформлена мастацкімі расколінамі…

…і дазваляе разьвіваць хуткасьць аж да 17 км/г!

За Слабадзкім праездам велапаласа заканчваецца. Трэба пакінуць нешта й наступным мэрам.

Увогуле велапалосы — выдатнае месца для захоўваньня аўтамабіляў, бочак з квасам ці яшчэ якіх сацыяльна значных артэфактаў.

У адрозьненьне ад бардзюрышчаў на супрацьлеглым баку, па трасе велапаласы ходнікі падсыпаныя. Калі спэцыяльна для велапаласы, то гэта паўкроку наперад, хоць і парушэньне СНІПаў.

Кароткі праваднік па менскіх веладарожках. Велапаласа на Ясеніна (квартал ад Касманаўтаў)
Кароткі праваднік па менскіх веладарожках

КППМВ, Куйбышава, 20

2011-07-01T12:31:00.000+03:00

Яшчэ адна слушная стаянка ля «Гарызонта».

Вартыя перайманьня як ейная канструкцыя, так і гісторыя стварэньня.

Камэры назіраньня не заўважыў, справа была вечарам, але пакуль я там ашываўся, за мной нехта падглядаў з суседняй бакоўкі.

View Праваднік па менскіх веластаянках in a larger map

Раварыстам можна езьдзіць толькі па…

2011-06-09T02:04:00.000+03:00

Калісьці віцебскі чын з ДАІ стаў аўтарам крылатага выразу «Няма такога месца, дзе б нельга было праехаць на ровары». А цяпер во на тым канцы Зямлі знайшоўся чалавек, які не паленаваўся гэта праілюстраваць.

Трэба гэтага героя запрасіць у Беларусь — пакатацца па бардзюрах.

Вывесьці раварыстаў на праезную частку

2011-06-09T01:42:00.001+03:00

Дзьмітрый Карзюк, начальнік управы ДАІ ГУУС Менгарвыканкаму:

— Мы выступаем за тое, каб часткова вывесьці раварыстаў на праезную частку — там, дзе гэта магчыма. Важна, каб кіроўцы паважліва ставіліся да тых, хто кіруе байкам, успрымалі іх як раўнапраўных удзельнікаў дарожнага руху.

«Мінскі кур’ер», «Сьмела — на вела!»

ВелаВільня

2011-06-04T01:14:00.000+03:00

Велапаласа ля Вострай Брамы.

КППМ веластаянках: Ракасоўскага, 145

2011-05-27T01:36:00.000+03:00

Самая бясьпечная менская веластаянка =)

Ёй бы яшчэ закругленыя вуглы…

Dziakuj, Pavieł, za navodku.

КППМ веластаянках: Някрасава, 5

2011-05-27T01:30:00.000+03:00

Той, хто прыдумаў перакуленыя колаўторквалкі, напэўна, дужа задаволены сабой.
Нават тое, што пры пэўнай фантазіі, імі можна скарыстацца, не адмяняе пачварнасьці задумы. На мой густ, вядома.

Дзякуй за наводку tumash і alex_radko.

КППМ веластаянках: Кісялёва, 12, «Гарызонт»

2011-05-26T01:35:00.000+03:00

Слушная веластаянка «Гарызонта» на Кісялёва, 12, і як усе слушныя — застаўленая роварамі! Цікава б было даведацца пра гісторыю яе стварэньня. Ну і запрашаю ў гарызонтаўскую сталоўку. Там някепскія абеды і інтэр’еры :).

Дзякуй Luo Biming за наводку.

КППМ веластаянках: Кісялёва, 12, начная крама

2011-05-26T01:25:00.001+03:00

Самая бяскрыўдная колаўторквалка зь сёньняшняй сэрыі. Але лепшае, вораг добрага, стаіць усяго за дзесяць мэтраў ля сталоўкі «Гарызонта».

Дзякуй Orange_blr і Luo Biming за наводку.

КППМ веластаянках: Ландара, 4

2011-05-26T01:17:00.000+03:00

Кола вісіць на сьпіцах.

Брак і грошы на вецер.

Дзякуй alex_radko за наводку.

КППМ веластаянках: Ракасоўскага, 11а

2011-05-26T01:10:00.001+03:00

Кола павісае на сьпіцах.

Брак і грошы на вецер.

Дзякуй Lazyest за наводку.

КППМ веластаянках: Якубава, 6а

2011-05-26T01:06:00.000+03:00

Нізкі пад’ём, зашырокая шчыліна.

Брак і грошы на вецер.

Палёт над велабанам. Зваротны рэйс

2011-05-20T00:42:00.000+03:00

Гэтым разам ад Аквапарка. І ў HD =)

А вось відэа паўтарагадовай даўніны з Дворышчаў у Ржавец.

Чым заняцца на велабане

2011-05-20T00:04:00.007+03:00

Наўзвочны доказ таго, што велаінфраструктура дае станоўчыя стымулы =)

Веладарожка на Ракасоўскага

2011-05-13T23:57:00.000+03:00

...зьявіцца пасьля рамонту праспэкта, паведамляе мімаходам «Ва-банк». Будзе веладарожка «з двухбаковым рухам» і ў парку ў Курасоўшчыне, які зробяць ля бальніцы хуткай дапамогі. Такія справы.

Велалес за Ангарскай

2011-04-24T23:20:00.001+03:00

А тым часам у лесе за Ангарскай праца кіпіць. Ужо дзе-нідзе нават можна праехаць, а дзе-нідзе нават па асфальце.

Мяркуючы, па дызайне, правая дарога — велабан(чык). Тут, праўда, можа скласьціся памылковае меркаваньне, што зьлева — іншая дарога. Так можа думаць толькі далёкі ад традыцый айчыннага веладарожачнага будаўніцтва чалавек. Гэта разваротнае кальцо, як на дзіцячай чыгунцы.

Але цікава, што левая частка — бяз ходніка.

Дарэчы, лес за Ангарскай сьпярэшчаны таксама вузейшымі дарожкамі невядомага пакуль прызначэньня. Гэтыя дарожкі дзе-нідзе ўжо залілі па самыя бардзюры чамусьці бэтонам.

Гэтак, глядзіш — Ангарская з тупіковага спальніка ператворыцца ў аб’ект велапаломніцтва.

У сьляпянскім лесе будуюць дарожкі

2011-04-19T02:08:00.000+03:00

Першы менскі веласэрпантын

2011-04-19T00:55:00.000+03:00

…зьявіўся ў Лошыцкім парку.

Там сама — прыгожыя і зручныя веластаянкі, якія патрэбныя там невядома на што.

Адкрыцьцё сэзону 2011

2011-04-17T22:02:00.000+03:00

Велабанныя навіны

2011-04-13T01:44:00.000+03:00

1. Насып цудоўным чынам зьнік, а мыйшчыкі аўтамабіляў засталіся.

2. Каляровая веластаянка на рынку «Сьвелта» таксама зьнікла. Можа, яе здалі на каляроыя мэталы, або які гаспадарлівы работнік схаваў куды ды забыў. Увогуле, базарным стаянкам не шанцуе ў Менску.
Вось так за зіму зьнікла палова серабранскіх веластаянак. Ля крамы «Сьвіслач» да кучы зьнікла і «стаянка» для сабак.

3. Загадкавы знак ля руінаў старой менскай электрастанцыі. Як ні круці.

Кароткі праваднік па менскіх веластаянках. Лагойскі тракт, 7

2011-04-07T10:45:00.000+03:00

Веластаянка ля крамы «Райдэр» мяне напужала. Ладна іржавая, але ж гэтыя колаўторквалкі мала таго, што гайдаюцца на вятры, але ж і выглядаюць разборнымі. Можа, там, вядома, усё запаяна і заржавела, але кідаць ровар у іх я не адважыўся і скарыстаўся такімі зручнымі парэнчамі побач.

Кароткі праваднік па менскіх веластаянках

Навіны велабану. Насып

2011-03-27T19:13:00.002+03:00

Серабранка, каля Якубава, 82.

Павялічыць
Асьцярожней там.

Віленскія роварні

2011-03-24T02:29:00.001+02:00

View Rovarni / Роварні in a larger map

Ня ведаю, як хто, а я ў кожным новым горадзе спачатку шукаю велапракат, каб потым пакатацца ды завітаць у мясцовыя роварні. І неяк у Вільні з гэтым аказалася ня так проста — вуліцы блытаныя, мова незнаёмая. Але ж ровары, ровары — тыя самыя. Каб наступнага разу не блукаць, склаў вось мапу роварняў і пракатаў. Усе адрасы, апроч двух, асабіста праверыць не пасьпеў, а большай часткай ўзяў з цудоўнага каталёгу dviratis.lt. Ну й яшчэ пазначыў, што мне ў віленскім інфармацыйным цэнтры паненкі нараілі.

Каб паглядзець усе мапы на адной

2011-03-19T02:42:00.001+02:00

…неабходна мець свой рахунак на Google. Патрэбную мапу трэба дадаць да сябе ў калекцыю (Save to my maps). Google дазваляе адкрываць па некалькі з сваіх мапаў і, чамусьці, толькі па адной з чужых.

Тады можна будзе паглядзець, напрыклад, ці супадаюць рэкамэндаваныя роварныя маршруты з наяўнымі веладарожкамі, і ці вядуць яны разам узятыя да роварных крамаў, і ці ёсьць ля тых роварных крамаў роварныя стаянкі.

View Рэкамэндаваныя роварныя маршруты in a larger map	View Праваднік па менскіх веладарожках in a larger map
View Праваднік па менскіх веластаянках in a larger map	View Rovarni / Роварні in a larger map

Лясная дарога ў горад. Акупацыя

2011-03-18T14:09:00.001+02:00

Тут такая гісторыя, што як толькі я пахваліўся Лясной дарогай ў горад, яе па адрасе Карвата, 94 акупавалі сабакі. Мушу папярэдзіць. Будзьце асьцярожныя.

Лясная дарога ў горад з Малінаўкі, Брылевічаў, Паўднёвага Захаду.

Роварныя маршруты для пачаткоўцаў.

«Мінскі кур’ер» прапануе спартоўцам-шашэйнікам трэніравацца на веладарожцы

2011-03-14T10:55:00.005+02:00

«Думаецца, дарэчнае і такое пытаньне: чаму падлеткі, хай нават і ў суправаджэньні дарослых, адточвалі тэхніку кіраваньня роварам на адной з самых хуткасных і ажыўленых трасаў гораду, небясьпечнай нават для аўтамабілістаў? Няўжо ў сталіцы няма іншых месцаў для трэніровак, напрыклад, тая ж веладарожка?»

Тренировка с потерпевшими, Ігар Голад, «МК»

...Ці тыя ж ходнікі. А што?

Лясная дарога ў горад. Закрыцьцё зімовай веланавігацыі

2011-03-09T20:51:00.000+02:00

Колькі ж вы надыхаецеся, пакуль едзеце праз прамзону, пытаюцца раз-пораз у мяне спачувальна. І не разумеюць усьмешкі ў адказ. Якая прамзона? Вы што! Сонца, лес, бліскучы сьнег, адлюстраваньні. Цудоўныя краявіды, вясковыя хаткі, усе віды пакрыцьця дарог. І гэта за гадзіну падарожжа да працы. Кожны дзень. Без турпуцёвак.

Лясная дарога ў горад. Летняя рэдакцыя. =)

Накаўт ад дарожнікаў

2011-03-04T15:42:00.012+02:00

Барацьба дарожных службаў супраць пешаходаў і раварыстаў за ходнікі скончылася канчатковай і адназначнай перамогай дарожных службаў. Прызнаём паразу.

Хоць, здавалася б, галалёды вытрымалі, сьнягі папратоптвалі і нават між адліжных азёраў-лужынаў знайшлі абходы. І, здавалася б, прыйшла вясна, а тут...

Імпэрыя нанесла ўдар у адказ. Круці не круці, а давялося вырульваць на праезную частку да фураў і тралейбусаў.

У чыноўніцкіх кабінэтах сядзяць людзі зь нетрывіяльнай фантазіяй. Прэмію за праяўленую крэатыўнасьць у месяцы сакавіку яны заслужылі!

Красамоўная ілюстрацыя, для каго, а дакладней для чаго працуюць дарожныя службы. Для асфальту, для травы, для прыгожага віду ў Google Earth. Ну а людзі, ну што людзі, калі раптам сустрэнуцца, дык трактар, так і быць, пабібікае.

Аўтамабіліст наўмысна пратараніў Крытычную масу ў Бразыліі

2011-03-01T13:54:00.003+02:00

Варшава — ня вёска, каб па ёй на ровары езьдзіць

2011-02-28T15:32:00.000+02:00

Сайт «Польшча на ровары» склаў гіт-парад самых абсурдных чыноўніцкіх выказваньняў на велатэму, тым чарговы раз падкрэсьліўшы інтэрнацыянальны характар як раварызму, так і бюракратызму. Вось толькі некалькі цытат.

«Варшава — ня вёска, каб па ёй на ровары езьдзіць».

(Марэк Вось, варшаўскі Дэпартамэнт гарадзкіх дарог).

«Калі [раварысты] наракаюць на цеснату, то хай купяць сабе вузейшыя ровары».

(Дырэктар дэпартамэнту гарадзкіх дарог і грамадзкага транспарту Быдгошча Ян Сюда).

«Веладарожка не павінна быць роўнай, як аэрадром — чым больш няроўнасьцяў, тым цікавейшай становіцца паездка».

(Прэзыдэнт гарадзкога воднага таварыства Радама Марэк Пакорскі).

«Пакуль я віцэ-прэзыдэнт, веладарожкі на Вале Медзяшыньскім ня будзе!»

(Віцэ-прэзыдэнт Варшавы Анджэй Урбаньскі, 2004).

«Давайце не перагінаць палку з будаўніцтвам веладарожак».

(Лех Качыньскі, прэзыдэнт Варшавы, 2003).

Увесь гіт-парад — на сайце «Польшча на ровары» — з камэнтарамі, але па-польску.
І дарэчы, Анджэй Урбаньскі ўжо не віц-прэзыдэнт Варшавы, а на Медзяшыньскім вале веладарожак аж цэлыя дзьве.
І дарэчы, у мінулую пятніцу ў Сэйме прынялі папраўкі ў Правілы дарожнага руху, закліканыя палепшыць існаваньне польскіх раварыстаў і выклікаць зайздрасьць у раварыстаў беларускіх.

Горад раварыстаў, 1984 год

2011-02-21T14:16:00.001+02:00

tv.sportedu.ru

Хрэстаматыйнае відэа, я лічу.
Унівэрсальная праграма раварызацыі на зразумелай постсавецкаму чынавенству мове.

500

2011-02-01T08:55:00.000+02:00

Менск акальцуюць роварныя дарожкі. Да 2015 году іхняя працягласьць складзе 500 кілямэтраў. Такія парамэтры закладзены ў Канцэпцыі разьвіцьця роварнага руху.

Яе распрацавалі адмыслоўцы Беларускай асацыяцыі экспэртаў і сурвэйвэраў на транспарце.

Як расказаў карэспандэнту «Менск-Навінаў» старшыня асацыяцыі Юры Важнік, сёлета ўвесну пачнецца рэалізацыя першага этапу канцэпцыі. У Маскоўскім і Першамайскім раёнах сталіцы плянуецца зьняць высокія бардзюры ды іншыя перашкоды для руху й арганізаваць бесканфліктны рух раварыстаў і мінакоў.

Кароткі праваднік па менскіх веластаянках. Партызанскі, 11

2011-01-27T12:26:00.001+02:00

«Вешалкападобная» колаўторквалка дагары нагамі. Ля крамы «Камінтэрна». Як табе ідэя купіць гарнітурчык, прыехаўшы на ровары?

Ідэя здораўская, я лічу. Але ў краме, калі пабачылі прыпаркаваны ровар і тыпуса ў шлеме ды з фоцікам, здарыўся сапраўдны пярэпалах. Адная прадавачка ажно выбегла на вуліцу, з усяе цёплае вопраткі — толькі бэджык. І адразу стала чапляцца з сумнымі пытаньнямі. А што гэта вы...? А хто вам даў...? А пакажыце... А зараз жа прэкраціце...

Дык вось, стаянка нішто сабе. Можна нават заднім колам улезьці і U-замок прасунуць. Але ці варта заходзіцца да тых, у каго звычайныя рэчы выклікаюць прыступы параноі?

Дзяды раварысты і сьнягуроварачкі

2011-01-25T20:01:00.000+02:00

Зімой раварыста на вуліцы сустрэнеш пакуль ня так часта, як летам. Мінулай суботы гэта ня тычылася. Раварысты сабраліся на Нямізе, пакоўзаліся на нячышчанымі велабане — і гуртом праехалі да Драздоў. Былі хто ў шлемах, хто ў шапках, хто ў адгазьніках. Хто на шыпах, а хто і на сьліках на шашэйніку. Так што зіма — не перашкода. Доказы прыкладаюцца.

Савок невынішчальны

2011-01-17T13:20:00.000+02:00

Веластаянка ля «Гіпа».

Горад для людзей

2011-01-16T01:07:00.007+02:00

Цікавая лекцыя пра плянаваньне гарадзкога асяродзьдзя і пра тое, адкуль у горадзе бяруцца раварысты, асабліва ўзімку.

...Cправа ня ў клімаце — справа ў стварэньні культуры, магчымасьцяў і стымулаў круглы год.

Капэнгаген стварае велакультуру, якая існуе і ўзімку.

30 гадоў таму Капэнгаген быў падобны да большасьці іншых гарадоў сьвету. Дужа мала людзей езьдзілі на ровары. Гэта распаўсюджаная аблуда, што ў Капэнгагене людзі спаконвеку езьдзілі на роварах. Папраўдзе, гэта ня так.

Але мы пачалі ствараць стымулы, пачалі «запрашаць» людзей езьдзіць на роварах. У цэнтры гораду кожную вуліцу рэканструявалі, зрабілі добрыя ходнікі і веладарожкі. Але гэта рабілася не ўвадначас, а паступова. Кожнага разу, калі рамантавалі вуліцу, стваралі зручныя ходнікі і зручныя веладарожкі. Паступова іх сетка расла. І разам з ростам сеткі веладарожак расла і колькасьць раварыстаў.

А потым мы сталі ўводзіць невялікія і простыя хітрыкі. Напрыклад, на сьвятлафорах аўтобусы і раварысты пачынаюць рух на 6 сэкундаў раней за аўтамабілі.

Муніцыпалітэт Капэнгагена штогод праводзіць апытаньне, чаму вы езьдзіце на ровары. Я думаю, яны ў тайне спадзяцца, што людзі скажуць: «Таму што гэта добра для ўстойлівага разьвіцьця». Але кожны год каля 70% людзей адказваюць «Таму што гэта самы хуткі і зручны спосаб руху». Сутнасьць палягае ў стварэньні умоваў і велакультуры.

На скрыжаваньні ходнік і веладарожка не перарываюцца, каб кіроўцы ведалі, што перасякаюць тэрыторыю ровараў і мінакоў і калі заяжджаюць, і калі выяжджаюць з завулка. Магу вас запэўніць, што для вялікай машыны не ўяўляе цяжкасьці пераехаць цераз такую перашкоду. Але для маленькай бабулькі спусьціцца, а потым зноў падняцца на бардзюр на кожным скрыжаваньні з завулкам ці праездам — пэўная праблема.

Учора мы былі ў Park Extention (раёне Манрэалю), і там у кожным месцы, дзе ёсьць гараж, увесь ходнік нахілены, каб машына магла заехаць — двойчы ў дзень, раніцай і ўвечары. А старыя жанчыны мусяць тамака хадзіць скасавураныя.

Гэта пытаньне расстаноўкі прыярытэтаў і стварэньня ўмоваў.

У Капэнгагене веладарожкі паднятыя на 4 цалі (каля 10 см) ўвышыню ад дарогі, а ходнікі на 4 цалі ўвышыню ад веладарожкі. Такім чынам машынам цяжэй трапіць на веладарожку, а раварысты ня езьдзяць па ходніках ды не трывожаць мінакоў. Гэта вельмі просты спосаб падтрыманьня добрай культуры дарожнага руху. Да таго ж гэта вельмі добры стымул для людзей езьдзіць на ровары і хадзіць пешшу ў горадзе.

Натуральна, ва ўсім грамадзкім транспарце можна перавозіць ровар. Вядома, вы можаце ехаць і на інвалідным вазку, і зь дзіцячай каляскай, і везьці багаж. Такім чынам, у Капэнгагене вельмі проста і зручна перасоўвацца. Гэта тычыцца і новага мэтро. Развой сетак, стварэньні мікрасетак, калі можна карыстацца грамадзкім транспартам і пры гэтым езьдзіць на ровары — вельмі прывабная магчымасьць для людзей.

На ўсіх асноўных магістралях, якія вядуць у цэнтар гораду, мы зрабілі «зялёную хвалю», але не для машын, а для ровараў. Так што цяпер ад 6-й ранку да паўдня, калі вы едзеце ў цэнтар гораду з хуткасьцю 20 км/г, для вас будзе «зялёная хваля» аж да самага цэнтру. А днём, з 12-й да 18-й гадзіны, у вас будзе «зялёная хваля» на выезд з цэнтру. Гэта таксама значыць, што машыны, якія едуць хутчэй, мусяць спыняцца на сьвятлафорах.

Калі вы хочаце падтрымаць культуру, вам трэба стварыць для яе ўмовы.

У нас цяпер ёсьць вялікая сетка веладарожак на вуліцах, і гэта вельмі важна, бо вуліцы сталі бясьпечнейшымі, на іх ёсьць жыцьцё, ёсьць рух. Вуліцы — першы крок. Цяпер мы ўводзім «зялёную структуру» — «зялёныя» дарожкі цераз паркі, зялёныя і жылыя зоны. То бок вам ня трэба ехаць побач з аўтамабілямі.

Гэта дае вельмі цікавы станоўчы эфэкт — раней безаблічныя раёны набываюць адметныя рысы. Зьяўляецца рух і як вынік пачынае віраваць жыцьцё, адчыняюцца крамкі, людзі прыяжджаюць туды і сустракаюцца. Гэтае вельмі невялікае ўмяшальніцтва, але яно нясе вялікія перамены для жыхароў гэтай мясьціны.

Мінула 30 гадоў, і цяпер 37% жыхароў езьдзяць на працу на ровары кожны дзень. Гэта ў «Вялікім Капэнгагене». У цэнтры ж гораду больш за 50% людзей езьдзяць на працу роварам. Мэта для «Вялікага Капэнгагена» да 2012 году, каб больш за 50% насельніцтва езьдзіла на працу на роварах.

Што ж адбываецца ўзімку, калі ідзе сьнег?

Перш за ўсё, веладарожкі чысьцяцца перш за дарогі. Таму што калі мы зробім наадварот, раварысты будуць вымушаны ехаць па дарогах і гэта створыць хаос. Гэта таксама адносіцца да стварэньня стымулаў і ўмоў.

Вядома, не заўжды ўдаецца своечасова прыбраць сьнег, але горад стараецца чысьціць веладарожкі да дарог, расстаўляючы гэткім чынам прыярытэты.

Заўважце, ніхто зь людзей, якія едуць узімку, не апрануты ў спартовую форму, ніхто зь іх ня ў латэксе, ніхто зь іх не выглядае як раварыст кшталту «я буду ўкручваць, пакуль не памру». Гэта звычайныя людзі, якія едуць на працу. Я неяк праводзіў лекцыю на тэму «мода на ровары», і ведаеце, высокія абцасы і футра — вельмі распаўсюджаныя.

На ўсіх веламаршрутах мы паставілі лічыльнікі раварыстаў, каб людзі бачылі, што яны робяць свой унёсак у паляпшэньне гораду.

Дзяцей ў вазках мы таксама перавозім на роварах. Раней у нас былі веладарожкі шырынёй 2,5 мэтра, цяпер мы пераходзім на 3 мэтры, бо гэткія ровары займаюць шмат месца.

70% людзей працягваюць езьдзіць на роварах узімку.

Такая сытуацыя ў Капэнгагене. І я думаю, гэта багата ў чым, як і ў іншых выпадках, пытаньне стварэньня культуры, стварэньня спрыяльных умоваў для гэтай культуры ва ўсе сэзоны, пытаньне стварэньня магчымасьцяў, каб гэтая культура існавала круглы год. Я думаю, гэта самае важнае, чаму вучыць досьвед Капэнгагена.

Вядома, вы можаце сказаць, што Капэнгаген — цудоўны стары горад. Таму я хацеў бы паказаць, што мы зрабілі ў Нью-Ёрку.

...Мэта была зрабіць Нью-Ёрк больш устойлівым і зручным для жыцьця. Мы зразумелі, што гэта вымагае зьмяненьня ладу мысьленьня і вылучылі 3 чыньнікі:

1. Мы хацелі зьменшыць аб’ём аўтамабільнага трафіку.
2. Мы хацелі стварыць умовы для альтэрнатыўнага транспарту.
3. Мы хацелі палепшыць грамадзкую прастору.

І мы зрабілі з гэтага стратэгію.

З таго, што мы прапанавалі 2 гады таму, Нью-Ёрк ужо рэалізаваў значную частку. На Мэдысан Сквэр, Гаральд Сквэр і Таймс Сквэр мы пераканалі Нью-Ёрк закрыць Брадвэй для аўтамабільнага руху, каб палепшыць скрыжаваньні і стварыць новыя грамадзкія прасторы.

Мы змаглі зрабіць роварныя дарожкі. Мы палепшылі пешаходныя пераходы і сувязі, мы стварылі астраўкі бясьпекі, так што маленькая бабулька можа перайсьці палову вуліцы, а потым пераадолець астатнюю палову. Мы скарысталі вулічныя паркоўкі, каб запаволіць рух машын па вуліцы, і зрабілі так, каб можна было адчыняць дзьверы машын без пагрозы раварыстам.

...Я думаю, матэматыка вельмі простая. Ці мы хочам атрымаць 12 шчасьлівых уладальнікаў прыпаркаваных машын, ці некалькі сотняў шчасьлівых нью-ёркцаў?

Справа ня ў тым, каб прыбраць машыны, але ў тым, каб даць месца ўсім.

І што цікава — закрыцьцём Таймс Сквэр і Геральд Сквэр, вядома, былі заклапочаныя аўтаўладальнікі і кіроўцы таксовак. Але ў выніку аказалася, што сярэдняя хуткасьць руху на 7-й авэню вырасла на 17%, а на 6-й — на 37%. Вось жа ўдалося стварыць грамадзкую прастору, аддаць месца людзям, арганізаваць прыемнае для знаходжаньня асяродзьдзе, зручныя ўмовы для раварыстаў і мінакоў, — і ў выніку гэта дазволіла машынам рухацца хутчэй.

Ва ўмовах сьнегападу і галалёдзіцы

2011-01-12T14:09:00.002+02:00

(камэнтар на poehali.net)

153. Раварысту забараняецца:
…
153.4. рухацца па дарозе ва ўмовах сьнегападу і (ці) галалёдзіцы;

Правілы дарожнага руху¹

Што цікава — і зімой і летам не сьціхае мазгавая актыўнасьць ахвотнікаў абгрунтаваць законную немагчымасьць перамяшчэньня на ровары ў горадзе. Варылі б боршч, чэснае слова.

Што да гала~~дзеві~~ледзіц. Ладуцька заўчора сказаў, што на вуліцах Парадак наведзены. Так што калі хто будзе і далей лямантаваць пра галалёдзіцу — будзе аб’яўлены дыскрэдытатарам сталіцы нашай радзімы. Усё вычышчана, пасыпана экалягічным пясочкам і засьцелена дывановымі дарожкамі. Закрылі тэму. Галалёдзіца як зьява сацыяльная ў Менску немагчымая. Кропка. За ўсе зімы ніводзін даішнік, у адрозьненьне ад тутэйшых заўсёднікаў, у гэтым не засумняваўся. Аж крыўдна. Так і хочацца пахваліцца шыпамі на пакрышцы. Яны ж, калі правілы выдумвалі, пра такое дзіва заморскае і ня чулі. (Часам у Менску можа здарацца галалёд як зьява атмасфэрная, але тут ужо коўзайся па ледзяной корцы, колькі душа схоча — правілы не забараняюць.)

Што да сьмеха…, то бок сьнегападу, то гэта, як вядома зь Вікіпэдыі — выпадзеньне сьнегу з аблокаў. Як што яшчэ далёка ня ўсе экіпажы ДАІ валодаюць апаратурай па вызначэньні, адкуль менавіта выпадае дадзены сьнег над дадзеным раварыстам, фактаў зафіксаваных прэтэнзій да апошніх пакуль не адзначана. Ну і ўвогуле здаровы дарослы чалавек, скончыўшы школьны курс фізыкі, ведае, што сьнег мяккі і пухнаты і неяк уплываць на рух ровара можа хіба пры дасягненьні ўзроўню восі кола, ды і тое ня факт.

Неабходна адзначыць, што ў правілах словы маюць своеасаблівыя значэньні, якія прадбачліва прыводзяцца ў пачатку кніжыцы. Вось калі спытацца ў мамы на велабане, ці гэта дарога, яна ад сьмеху ў Сьвіслач зваліцца. А па правілах — дарога самая сапраўдная. Недзе там глыбока пад сьнегам, але ва ўмовах сьнегападу і галалёдзіцы — ні-ні! А, дык вось менавіта сьнегапад і галалёдзіца ў правілах не апісаныя, а таму застаюцца паняткамі глыбока паэтычнымі.

Ну і нарэшце дарога, калі верыць нашым правілапісьнікам — дзеўчына такая непастаянная. Вось у адным месцы, як тут слушна заўважана, яна і ходнік, і ПЧ, і веладарожка, а ў другім, чытаем:

Афіцыйны камэнтар: У пункце 149 Правілаў панятак «рух па дарозе… на ровары» азначае рух раварыстаў па праезнай частцы дарогі ў адзін шэраг не далей за 1 м ад ейнага правага краю (пункт 148 правілаў)…

А пункт гэты, пра які камэнтар, не пра нейкія лірычныя мяцеліцы з галалёдзіцамі, а пра фары ўначы. Якія, як вынікае, абавязковыя толькі на праезнай частцы дарогі, а на пеша- ды веладарожках — хоць перадавіцеся.

Дык вось. Варта ўжо зразумець, што місія апошніх правілаў — вытурыць раварыстаў з праезнай часткі. Місія выканана. Што там па-за ПЧ — зона нябачнасьці і пабарабаннасьці. Галалёды, пешаходы, сьнегапады, пешапады, мэтэорны дождж; хоць бяз фар, люстэрак, тармазоў і 15 сьпіц — катайцеся, сутракайцеся, куляйцеся і разьлятайцеся на здароўе.

Фрырайд па Радыяльнай

2011-01-11T22:31:00.002+02:00

148. Рух на ровары мусіць ажыцьцяўляцца па роварнай дарожцы, а пры ейнай адсутнасьці — па ўзбочыне, ходніку ці пешаходнай дарожцы, без чыненьня перашкод для бясьпечнага руху пешаходаў.

Правілы дарожнага руху.

«На улицах порядок навели».

Старшыня Менгарвыканкаму Мікалай Ладуцька, 10.01.2011

Что касается использования велосипедов в зимнее время, то… в настоящее время его использование не ограничено временами года.

Анлайн-канфэрэнцыя з супрацоўнікамі ДАІ. kp.by, 2008.

Што ж, зіма ёсьць, ходнік ёсьць, вуліцы з наведзеным парадкам ёсьць — паехалі!

Радыяльная вуліца — частка другога кальца, дарога з Аўтазаводу ў цэнтар. Справа — прыватны сэктар, зьлева — імпэрыі заводаў, так што дарог «у горад» усяго адна. Калі ня ўлічваць адсутнасьць ходніка на пачатку Радыяльнай і слой слоты да вобада далей, пачатак някепскі, але насупраць ТЭЦ…

Прыехалі!

Я дворніка-трактарных унівэрсытэтаў не канчаў, таму як навукова называецца гэты прыём упарадкаваньня засьнежаных вуліц, ня ведаю. Але ён дужа распаўсюджаны. Па дарозе да Акадэміі навук сустрэўся чатыры разы. Хай будзе «вялікая пешаходная сьцяна». (№1)

За «вялікай пешаходнай сьцяной» (№1) кашы становіцца болей (гаршчочак, не вары!). Не язда, а выяжджаньне. Хуткасьць 6 км/г. Затое застаюцца сьляды ў гісторыі =). Гэты, справа, — мой учорашні, яму ўжо суткі. Колькі пройдзе да наступнага прышэсьця трактара з шуфляй?

Па выежджанай аўтамабілямі каляіне відаць, які запас таяньня сьнежнай дрыгвы назьбіраў упарадкавальнік вуліцы Радыяльнай. Куча сьмецьця — пэрформанс неразгаданага мной прызначэньня.

Перад мостам на Запарожскую — мяжа ўплываў. Трактар сваю тэрыторыю «зачысьціў», а чорна-зялёныя чалавечкі счышчаюць веласьляды з сваёй тэрыторыі. Нэйтральная зона абазначаная «вялікай пешаходнай сьцяной» (№2)

і «вялікай пешаходнай нічыйнасьцю» (№3).

№4 — акурат за прыпынкам «Вуліца Сталетава». Фоткаць перадумаў, і так канцэпцыя зразумелая.

Назад вырашыў зрабіць крук, каб ня коўзацца ў сьнежнай кашы, але быў жорстка абламаны на вуліцы Смаленскай. Там, дзе яна сустракаецца з абрубкам зарэчнай Чырвонаармейскай, увогуле зрабілі сьнежную звалку і ператварылі ходнік у самазвальнік.

Відэавэрсія ў рэвэрсным рэжыме

Апдэйт з пазнакай «маланка»

15 студзеня рух па Радыяльнай спыніўся зусім. Сэкунд на 5. Я аслупянеў. Перад вачыма ляжала Радыяльная, вычышчаная так шырока, як ніколі. Ці то так супала, ці то нехта ў Заводзкім раёне чытае «БелаВела», але ходнік на Радыяльнай (строга ў межах Заводзкага раёну) так шырока на маёй памяці ня чысьціўся ні разу. Рэспэкт завадчанам.

Партызаны, у вас ледзяная горка на спуску ля «Слодыча».
Першамайцы, у вас ад Макаёнка на Баграціёна дык зусім бабсьлейная траса без надзеі на тармажэньне. Бярыце прыклад!

Цуды на Каляды

2010-12-27T17:46:00.002+02:00

Дакладней, магічныя зьнікненьні.

3 месца. Зьнік велабан. Летам быў, а цяпер няма. Цуд так сабе, бо ўжо другі год тое самае.

2 месца. Зьнікла веластаянка ля ўнівэрсама Сьвіслач. І сапраўды, калі разважыць — і велабан побач зьнік, і раварыстаў тэарэтычна быць не павінна. Навошта стаяць ёй іржавець? Можа, таваравед пад стол засунула для лепшай захаванасьці казённай маёмасьці. Што да практыкі — дык ля «Гіпа» ля веластаянкі сьнег веласьляды не пасьпявае зацярушваць.

1 месца. На 2-м Роварным завулку зьніклі высокія бардзюры. Не пад сьнегам зьніклі, а самі. Бардзюры ў нас кшталту фэтышаў: ходнік можа быць замеценым, затое бардзюры — вычышчаны, як медзякі. Дык вось тыя бардзюры — здрабнелыя зусім, трэба будзе вясной праваднік па гэтай велапаласе перапісваць. Калі фарба не сатрэцца ўшчэнт ды знакі не адваляцца.

Кароткі праваднік па менскіх веластаянках. Мотавела

2010-12-16T14:35:00.002+02:00

Партызанскі праспэкт, 8.

Новая мадыфікацыя тутэйшых трохкутных фантазій. Першы раз я гэтую канструкцыю бачыў яшчэ летам ля нейкай адзежнай крамы, дык падумаў, што гэта якая прыстасовіна для гандлю гарнітурамі, кашулямі ці іншай апранахай.

З пачуцьцём ніякаватасьці паспрабаваў прыладзіць ровар у гэтую вешалку. Той залез нехвотна, пачапляўшыся вілкай.

Хоць, можа, я яго няправільна ставіў. Можа, яго таксама трэба таго… дагары нагамі?

Кароткі праваднік па Менскіх веластаянках. Чэрвенскі рынак

2010-11-10T01:36:00.000+02:00

На Чэрвенскім рынку зноў узьнікла веластаянка.

Каб Віталіч больш не адкруціў, канструкцыю прыбілі кавалкам арматуры.

Я ведаю ноль прычын, каб пакідаць ровар каля Чэрвенскага рынку. Ну але традыцыйны дзякуй за клопат пра раварыстаў, хай сабе і ў несэзон.

На Чэрвенскім цяжка выбраць зручнае месца для велапаркоўкі, але выбралі самае нязручнае — на вузкім ходніку адразу ля ўваходу на прадуктовы базар. Ровар тут замінае. А зручна для ўсіх прыпаркавацца пры жаданьні можна да гэтых цудоўных мэталічных выгінаў агароджы.

Кароткі праваднік па Менскіх веластаянках. Вуліца Якуба Коласа, 30

2010-11-05T14:13:00.000+02:00

Колаўторквалка ля «Спорттавараў» на Якуба Коласа.

Канструкцыя па колаўторквальным рэйтынгу добрая.

Ну але ровар здорава вытыркаецца на пешаходную частку, хто задзене — пярэдняе кола пагне.

Тут бы колаўторквалку на сама болей тры месцы ды разьвярнуць, каб ровар паралельна сьценцы стаяў. А лепш увогуле былі б П-падобныя стойкі, але гэта пакуль нашы сьветлыя галовы вынайдуць…

Кароткі праваднік па Менскіх веластаянках. 2-я БДУшная

2010-11-05T14:00:00.000+02:00

Вядучы ўнівэрсытэт краіны зрабіў яшчэ адну страхотную канструкцыю, у якую можа ўлезьці кола ровара. Але паставіў яе гэтым разам не ў глухім куце, а пад самым носам вартаўніка брамы ўнівэрсытэцкага дворыка. Месца вырашае.

Старая стаянка таксама стаіць, але там нікога там прыпаркаванага не было.
А яшчэ ж ля БДУ падземны велапаркінг ёсьць. Эх, мае студэнцкія гады…

2011 год: Абедзьве веластаянкі перанесьлі пад дрэва ля хіфаку.

Ходнікі поўныя нечаканасьцяў

2010-11-04T17:28:00.001+02:00

Плошча Якуба Коласа, не абы што.

Кароткі праваднік па Менскіх веластаянках. Машэрава, 77

2010-10-07T17:36:00.000+03:00

Колаўторквалка ля крамы «Прэстан».

Ровараў-гігантаў для яе яшчэ належыць вынайсьці вядучым айчынам АН, НДІ і СПТВ.

Стаіць у глухім куце аўтастаянкі.

Чамусьці ля другой крамы «Прэстан», на Багдановіча, веластаянкі няма.

Кароткі праваднік па Менскіх веластаянках. Лабанка, 94

2010-10-05T01:51:00.000+03:00

Стандартная «гуманная» колаўторквалка ў «прастор»-стылі ля сухараўскага «Максімуса».

Варыянт на тры ровары. Стаіць перад уваходам на бачным месцы.

Ровар не вісіць, кола трымаецца ў двух месцах — што яшчэ трэба?

Кароткі праваднік па Менскіх веластаянках. Купрэвіча, 1/1

2010-10-05T01:42:00.000+03:00

Другая слушная веластаянка па адным адрасе.

Стаіць у арцы — дождж не заліе. Ёсьць камэры.

Непадалёк у двары — звышвысокатэхналягічная, зарослая травой велаўторквалка.

Калі аднойчы адчыняць веламузэй, гэта будзе цэнтральны экспанат.

Веладарожкі па ўсёй краіне

2010-09-25T11:25:00.000+03:00

Міністэрства спорту і турызму шукае інвэстара для стварэньня сеткі веладарожак па ўсёй Беларусі.

Пра гэта паведаміў намесьнік міністра спорту і турызму Чэслаў Шульга 24 верасьня на прэсавай канфэрэнцыі ў Менску, піша TUT.BY з спасылкай на БелаПАН.

Кароткі праваднік па Менскіх веластаянках. Купрэвіча, 1/3

2010-09-25T01:49:00.001+03:00

Шчасьце ёсьць!

У Менску знойдзеная першая эталонная веластаянка. Нават у іржавым стане яна ня можа ня выклікаць скупую сьлязу раварысцкага замілаваньня.

Сюды трэба вадзіць экскурсіі арганізаваных груп чыноўнікаў і высокія замежныя дэлегацыі. На жаль, краіна ня можа сабе дазволіць другой такой раскошы. Яна надзейна ўкапаная ў зямлю, бо іначай, несумненна, паднялася б у неба і паляцела на Марс, амэрыканцам на зайздрасьць. Бо і прыляцела яна адтуль па сакрэтнай праграме абмену. Адкуль жа яшчэ ёй тут узяцца…

Кароткі праваднік па Менскіх веластаянках. Прастораўскія

2010-09-25T01:22:00.001+03:00

Нешта ў лесе здохла (выбачайце за натуралізм).

Здарылася «тое, чаго ніколі ня будзе». «Прастор» такі паставіў веластаянкі, хоць цьвердзіў, што яны праектам не прадугледжаныя, а паркавацца вольна і крэатыўна можна на аўтастаянках, балазе тыя стаяць напалову пустыя. Але відавочны і, што ўжо тут сьціплічаць, адзіна слушны пункт погляду, які палягае ў тым, што гіпэрмаркет бяз роварнай стаянкі ні разу не гіпэрмаркет, перамог — хто б сумняваўся! А вось тое, што перамог ён так хутка, зьдзівіла і парадавала. Дзякуй тым раварыстам, хто не ленаваўся і пісаў у кнігі прапаноў, а пасьля атрымліваў адпіскі. Дзякуй прастораўцам, што пайшлі насустрач пажаданьням сваіх пакупнікоў з актыўнай жыцьцёвай пазыцыяй і зайздроснай жыцьцёвай зацятасьцю (я, да прыкладу, так у «Прастор» пасьля іхнай адпіскі ні разу і ня зьезьдзіў).

Што да веластаянак — нішто сабе, гэткія «колаўторквалкі-экстра»: кола захопліваецца ня толькі зьнізу, але і сьпераду. Можна злаўчыцца і прычапіцца нават U-замком.

Камэраў назіраньня заўважыў, але такіх, каб глядзелі на веластаянкі — не.
Вышэй — карціны зь веластаянкай ля шабаноўскага «Прастора» (Партызанскі, 182, далейшы ад Ротмістрава ўваход), ніжэй — адзіны магчымы ракурс стаянкі на Дзяржынскага, 104.

Гэтая стаянка месьціцца справа ад бліжэйшага да вуліцы Ясеніна ўваходу ў цёмным куце, затое зь велапарковачным знакам над ёй. Месца зацішнае. Настолькі, што поўны чорнай няўдзячнасьці велапакупнік падчас фотасэсіі запаркаваўся, як і ў ранейшыя гады, да слупа са сьцягам ля лесьвіцы. Зь іншага боку — наўзвочны прыклад, чаму веластаянкі лепей ставіць раней, чым пазьней, а лепш адразу.

Баязьліўцам дакладаю, што камэраў, скіраваных на веластаянку, там няма. Затое ўвесь час нехта з супрацоўнікаў паліць цыгаркі, з павагай паглядаючы на атрыбуты здаровага ладу жыцьця.

А што, спытаешся, чыжоўскі «Прастор»? А чыжоўскія раварысты, відаць, слаба прасілі.

Кароткі праваднік па менскіх веластаянках. IBB

2010-09-20T12:21:00.001+03:00

Веластаянка ля IBB-цэнтру — сама прыгажосьць: акуратная, стылёвая, гладкая, бачная і з вуліцы, і з будынку.

Вось толькі расстройства — ровар вісіць! Вісіць, нягоднік, на сьпіцах, псуе настрой і прыгажосьць. Так што useless. Калі толькі збоку ад уторквалак прычапляцца…

Праспэкт Газэты «Правда», 11.

Дзякуй lazy за наводкі.

Кароткі праваднік па менскіх веластаянках. Роварня «Райдэр»

2010-09-20T12:04:00.000+03:00

Вуліца Чарвякова, 3.
Ля крамы спорттавараў «Райдэр».
Стаянка недапрыкручаная і гайдаецца, а яшчэ дужа малая вышыня захопу кола, калі хто зачэпіць ровар — сьмерць обаду.

Кароткі праваднік па менскіх веластаянках. БДАТУ

2010-09-20T11:54:00.000+03:00

Праспэкт Незалежнасьці, 99/2. Беларускі дзяржаўны аграрны тэхнічны ўнівэрсытэт.
Ля корпусу ў двары — дзьве стаянкі «аграгарадоцкай» канструкцыі з кожнага боку параднага ўваходу. Пруты закругленыя там, дзе неабавязкова, і простакутныя там, дзе труцца аб раму. Сьпераду на зямлі — планка невядомага прызначэньня.

Месца зводдаль ад праспэкту і выпадковых вачэй, да таго ж выдатна праглядаецца з вокнаў, што рэзка ўздымае рэйтынг стаянкі да ўзроўню практычна ідэальнага.

У БДАТУ можна сьмела езьдзіць на ровары.

Двайнік стаянкі — праз двор.

Ходнікі поўныя нечаканасьцяў. Гарэцкага.

2010-09-17T17:08:00.000+03:00

Кароткі праваднік па менскіх веластаянках. Громава, 20

2010-08-19T01:25:00.000+03:00

Унівэрсам «Суседзі» — першая запэленгаваная веластаянка ў Малінаўцы.

Я нават не пасьпеў схадзіць у краму, а пешаходы ўжо незадаволена хмыкалі, што ім трэба абыходзіць мой ровар на аптымальнай траекторыі да сходаў.

Колаўторквалка прыкручаная, але хістаецца.

Дзякуй lazy за наводку.

Кароткі праваднік па менскіх веластаянках. Напалеона Орды, 6

2010-08-19T01:18:00.001+03:00

Стандартная колаўторквалка ля новай «Омы» ў Брылевічах.

Толькі адлегласьць між прутоў такая, што кола не сьцісакаецца, а нават боўтаецца.

U-замком не прычэпішся, ну але дзякуй і за гэта.

Кароткі праваднік па менскіх веластаянках. Велагараж у Зялёным Бары (2).

2010-08-19T01:12:00.000+03:00

У першым велагаражы ўжо не засталося месцаў, вось ля навабуду па Аляксандрава, 16 і зрабілі новы.

Паводле мясцовых жыхароў, арэнда месца платная, 19 тысяч у месяц.

Адно што з выгляду веластойка ў гаражы абы-якая, хапае колы за сьпіцы.

Што да відэакамэраў, дык імі абвешаны ўвесь гэты незвычайны мікрараён.

p.s.: ля 1 пад’езду гэтага ж, 16 дому, стаіць у дадатак звычайная гасьцявая веластаянка.

Мікрараён узорнага велаўтрыманьня.

Кароткі праваднік па менскіх веластаянках. Брылеўская, 3

2010-08-11T13:06:00.001+03:00

А вось мілай стаянкай на Брылеўскай, 3 карыстацца ня зручна.

Кола павісае на сьпіцах. І далей можна нічога не казаць. Брак, несумяшчальны з выкарыстаньнем па прызначэньні.

Бракаваная стаянка высоўваецца на ходнік, чакае, калі па начы на яе наляціць які незнаёмы зь мясцовасьцю раварыст ці пешаход.

Добра, што побач зь недарэчнай колаўторквалкай знаходзіцца ідэальная для паркаваньня агароджа.

За наводку дзякуй lazyest’у

Кароткі праваднік па менскіх веластаянках. Пераможцаў (Машэрава), 17

2010-08-11T12:49:00.001+03:00

На Пераможцаў (Машэрава), 17 — чырвона-зялёнае гігінцкае страхоцьце. Тым ня менш, карыстацца можна, і я б нават сказаў зручна.

А што да зьнешняга выгляду — дык каларыт! Інтурысты ж дзеля гэтага сюды і езьдзяць.

Без стаянкі (калі не лічыць «Юбілейнай» гасьцініцы) засталася адна вежа — Пераможцаў, 11 — тая, дзе роварня «Веламанія» і двухпавярховая кнігарня «Сьветач».

За наводку дзякуй Paŭłu.

Кароткі праваднік па менскіх веластаянках. Пераможцаў (Машэрава), 7

2010-08-11T12:36:00.001+03:00

Жоўта-зялёная колаўторквалка арыгінальнай канструкцыі проста на ходніку дарогі прэзыдэнцкага значэньня.

Побач крама, камітэт, казіно і бібліятэка.

Ёсьць камэра, але глядзіць на казіно.

З паловы парковачных месцаў ровар вылазіць на ходнік.

У раварыстаў забіраюць нават ходнікі

2010-08-08T13:22:00.002+03:00

Зь верасьня ўносяцца зьмены ў Правілы дарожнага руху, піша Resurs.by і дае карцінкі фатакопій дакумэнту. З тых фатакопій цяжка нешта разабраць, але ж нас цікавіць адзін пункт — 148.

Дык вось, пад параграфам 1.25 на гэтай выяве чытаем:

у абзацы першым пункту 148 словы «ходніку ці пешаходнай дарожцы, не ствараючы перашкодаў для бясьпечнага руху пешаходаў» замяніць словамі «краю ходніка з боку праезнай часткі ці краю пешаходнай дарожкі, забясьпечваючы бясьпеку пешаходаў»;

Прасьцей кажучы, ня толькі па праезнай частцы нельга, але і па ходніках не зусім можна. Да рытарычных велапытаньняў дадаецца яшчэ адно вар’яцкае: дзе сканчаецца ~~сіняе мора~~ край ходніка? Няправільны адказ каштуе ад 35 да 105 тысяч, нагадаю.

Велаэнтузіясты, якія наракалі на маўчаньне як рэакцыю на свае ініцыятывы і pdf-файлы, атрымалі красамоўны адказ. Красамоўней можна толькі матам.

Да пабачэньня, наш сіненькі мішка

2010-07-15T11:42:00.000+03:00

15 ліпеня роварня «Сіні мядзьведзь» з гандёвага цэнтру «Люстэрка», што ў цэнтры сталіцы на Камароўскім рынку, пераяжджае па адрасе свайго сайд-праекту «Велаплянэта» на вуліцу Прытыцкага, 2, корпус 1, што насупраць Кальварыйскіх могілак.

У раёне Камароўкі застаецца толькі адна роварня — «Драґонбайк» у склепе пад «Манежам» на Куйбышава, 69.

Усе роварні

555 веласантымэтраў у дзень

2010-07-13T13:43:00.001+03:00

Раённым адміністрацыям цягам тыдня трэба прапрацаваць прапановы па далейшым разьвіцьці велатрасаў у Менску. Такое даручэньне даў старшыня Менгарвыканкаму Мікалай Ладуцька на апэратыўнай нарадзе ў гарвыканкаме.

У сярэднім у кожным адміністрацыйным раёне трэба працягнуць сетку веладарожак на пяць кілямэтраў. Тэрмін выкананьня задачы — канец 2012 году. Апроч таго, падчас праектаваньня жылога раёну Шчомысьліца пры будаўніцтве транспартных разьвязак трэба прадугледзець калідоры для руху раварыстаў, адзначыў Мікалай Ладуцька. Ён падкрэсьліў, што велатраса вельмі запатрабаваная ў месьцічаў.

Цяпер яна праходзіць цераз тры раёны гораду — Цэнтральны, Партызанскі і Ленінскі. Ейная працягласьць складае 27 кілямэтраў, паведамляюць «Мінск-навіны».

Няцяжка падлічыць, што тэмпы будаўніцтва велашляхоў па кожным з раёнаў маюць скласьці 555 сантымэтраў у дзень. Калі браць пад увагу, што «сетка веладарожак» у Менску — гэта расфарбаваныя ходнікі, то 900 дзён для малярных працаў, вядома, зашмат. Нават калі гаварыць пра дарожку ўзроўню славутага «велабану», тэрміны ўражваюць.

Пахвальны клопат пра жыхароў няісных яшчэ Шчомысьліцаў. Але вось будуецца разьвязка на Маякоўскага, рыхтуецца ў Чыжоўцы, цягнецца 1-е кальцо. Ці падбаюць пра раварыстаў на гэтых аб’ектах?

Арганізацыя велаінфраструктуры мусіць быць закладзена пры кожным новым будаўніцтве ці рамонце дарожнай сеткі. Тады ня трэба будзе на апэратыўных нарадах абмяркоўваць па адной разьвязцы за раз, а чыноўнікі змогуць заняцца больш карыснай працай, чым прыдумваньне за тыдзень, як бы ім за два з паловай гады накруціць 5 км асфальту па сваім раёне.

Яшчэ ў 2008 годзе ў рамках ініцыятывы «Партнэрства дзеля бясьпекі» на сайце sb.by былі апублікаваныя прапановы раварыстаў, пазітыўна ацэненыя ўдзельнікамі ініцыятывы.

У дапамогу чыноўніку:

Прапановы па веладарожках (PDF)

Прапановы па бардзюрах (PDF)

Кароткі праваднік па менскіх веладарожках. За Вясёлкавым

2010-07-12T14:25:00.000+03:00

Перад мостам у дыпгарадок налева, за гародамі Вясёлкавага мікрараёну ідзе асфальтаваная сьцежка. Перад сьцежкай з боку Крупцоў стаіць знак веладарожкі. Але ў ясны сонечны дзень ехаць на ровары, хутчэй за ўсё, давядзецца побач па траве. Дарожка — зручны шлях у тутэйшую зону адпачынку, і на ёй могуць зьмясьціцца тры-чатыры чалавекі з дружнай пешай кампаніі. Акрамя знаку ля прэзыдэнцкай трасы, больш ніякіх прыкметаў прыналежнасьці гэтай дарожкі да ровараў ня выяўлена.

Кароткі праваднік па менскіх веластаянках. Велацмок (Dragon-bike:)

2010-07-10T02:04:00.000+03:00

Велакрама гэта вам не гастраном які. Таму непрыкручаная колаўторквалка на залік ня цягне, хай сабе і з кандыцыянэрам =).

У мяне U-замок, мне давядзецца паркавацца да гэтых бліскучых парэнчаў на пярэднім пляне.

Кароткі праваднік па менскіх веластаянках. Ракасоўскага, 1

2010-07-09T01:36:00.001+03:00

«Рублёўскі», колішні «Прыпутнік» , вырашыў не адставаць ад канкурэнта праз дарогу — «Гіпа» — і паставіў каля ўваходу таксама веластаянку. Серабранка заваёўвае званьне самага веластаяначнага раёну сталіцы. Цікава, у чым сакрэт?

Кароткі праваднік па менскіх веластаянках. Маскоўская, 1

2010-07-09T01:24:00.000+03:00

Вось і другая палавінка знайшлася .

Правілы не пры чым

2010-07-08T14:16:00.001+03:00

Сур’ёзны тэкст пра рух па ПЧ — Vehicular Cyclists - Cycling's Secret Sect.

І вось якія думкі пасьля прачытаньня:

Нашыя правілы не такія і кепскія. Для масавасьці раварызму, для вываду веларуху ў мэйнстрым, такі, каб выбар ровара быў больш зручны ў параўнаньні з выбарам аўто, трэба: ніякіх ПЧ, ніякіх правоў, ніякіх абавязковых шлемаў і камізэлек, ніякай велапрасунутасьці. Мінімальны стартавы набор для ўваходу ў веласупольнасьць. Гэта ўсё закладзена ў нашых наяўных правілах. Капаць трэба ня тут.

Капаць трэба ў справе рэалізацыі закладзенага.

1. Інфраструктура

1.1 Выкананне зноў жа існых, наяўных, гатовых нарматываў. Пакласці бардзюр 20 см вышынёй ці 0 см, як належыць, — каштуе тыя самыя грошы. Выдаткі — 0 р. 0 к. Дарогі з парушэннем нарматываў не павінны прымацца горадам.

1.2. Перасячэньне веладарожкі з дарогай наносіцца побач зь пераходамі. Хай там веладарожкі і няма. Выдаткі — фарба. Разьметка ў правілах ёсьць, але не выкарыстоўваецца. Ад гэтай фобіі трэба пазбаўляцца.

1.3 Ходнікі. Расфарбаваць. Даўно пара расфарбаваць праспэкт, відавочная і капеечная справа. Ямы трэба латаць. Шкло трэба прыбіраць. Не таму, што раварыстам хочацца, проста і так трэба. Без рэвалюцый. Трэба ўжо цяпер і па цяперашніх нормах.

Горад мае права выбраць, што яму выгадней — прывесьці да ладу ходнікі ці адгарадзіць раварыстам велапаласу на ПЧ з забаронай паркоўкі і заезду.

Даць людзям на працы ставіць ровары ў склеп, на стаянку, за вахцёрам, у курылцы ці дзе яшчэ, каб не баяцца. Агромністыя памяшканьні на прадпрыемствах заваленыя лухтой ці проста стаяць пустыя. Офісныя будынкі нічым ня лепшыя. На крайні выпадак можна скінуцца на такі велагараж, як у Зялёным Бары. Капейкі.

Усе нашы беды ўпіраюцца ў тое, што тэарэтычна ўсё як мае быць, толькі робіцца «пусьці — павалюся».

Але па вялікім рахунку правілы тут не пры чым. Кепска толькі, што па ідэалістычных правілах штрафуюць на рэальных дарогах. Але запісаць «наша краіна — савок, езьдзіце, маньякі, хоць пасярод дарогі, усё роўна ніколі для вас нічога нармальнага ня зробяць», — ну хто ж так напіша... ДАІ на ўсе прапановы можа сказаць «у нас ах...енныя правілы, хоць пад музыку сьпявай, а што ходнікі фіговыя, бардзюры высокія, — гэта не праблема ДАІ». Так што ДАІ трэба раскручваць на лібэралізацыю пераезду ПЧ і ўвогуле ліквідацыю сцэнару «раварыст сьпешваецца» — з дапамогай магчымасьцяў існых ПДР.

Астатняе — гэта ўжо іншыя франты. І ў адрозьненьні ад ДАІ, якое спраўна выдае нам штрафы, дасканала выконваючы свае прафэсійныя абавязкі, дарэчы, — там цьма цьмушчая.

Дорага? Велабан — гэта дорага. Каравыя масты — гэта дорага. Рабіць ляніва і няякасна, замест апэратыўна і як след — гэта дорага.

Кароткі праваднік па менскіх веластаянках. Мантажнікаў, 2

2010-07-07T14:43:00.002+03:00

Ля гіпэрмаркета «Эўраопт» між Малінаўкай і Сухаравам за кальцавой, ля паўночнага ўваходу. Я нават умудрыўся U-замком прычапіцца. Адно што адзіны велабясьпечны шлях з Малінаўкі пад кальцавой перакапалі, паставілі бытоўку і завезьлі сабак.

Кароткі праваднік па менскіх веластаянках. Пуліхава, 3

2010-07-07T14:28:00.003+03:00

Клон веластаянкі ля «Беларусі» ў стылі «дах адарвало» паставілі ля гастраному на Пуліхава, 3. Колаўторквалка, кола ў якую лепш ня ўсоўваць. Можна паставіць задам, прыхіліць збоку, праявіць фантазію карацей. Велабан — праз дарогу.

Знайдзі 10 адрозьненьняў з экспанатамі нашай сталіцы

2010-06-30T13:55:00.001+03:00

Вытрымка з будаўнічых нормаў і правілаў «Вуліцы і дарогі гарадоў, пасёлкаў і сельскіх населеных пунктаў», БНБ 3.03.02 — 97.

4.5 Роварныя дарожкі

4.5.1 Роварныя дарожкі варта прадугледжваць

— на тэрыторыях жылых і прамысловых раёнаў, у парках і лесапарках;

— на магістральных вуліцах і вуліцах мясцовага значэньня катэгорый Е, Ж, якія забясьпечваюць пад’езд да гандлёвых цэнтраў, прадпрыемстваў, стадыёнаў, пляжаў, паркаў, выстаў, рынкаў, гаражоў пры інтэнсіўнасьці руху больш як 50 раварыстаў на гадзіну.

Прапускную здатнасьць адной паласы веларуху варта прымаць 300 раварыстаў на гадзіну.

4.5.2 Шырыня паласы роварнага руху і веладарожак прымаецца ў адпаведнасьці з табліцай 4.9.

Тып	Шырыня, м
Тып	у вольных умовах	мінімальная ў абмежаваных умовах
Паласа роварнага руху	1,5	1,0
Веладарожкі
аднабаковага руху	2,5	1,75
двухбаковага руху	3,0	2,5

4.5.3 Уздоўж магістральных дарог у паркавых зонах, лесапарках роварныя дарожкі робяцца для руху ў двух кірунках на адасобленым земляным палатне.

Пры двухбаковым руху варта прадугледжваць разьдзяляльную паласу шырынёй ня менш за 0,5 м, зробленую ў адным узроўні з праезнай часткай веладарожак.

4.5.4 Роварныя дарожкі робяцца на вуліцах, якія маюць прадольны ўхіл ня больш за 30%.

Дапускаецца прымаць прадольны ўхіл веладарожкі ад 40 да 60% на ўчастках працягласьцю ня больш за 300 і 100 м, на ўчастках большай працягласьці неабходна рабіць участкі з ухілам ня больш за 30% працягласьцю ня менш за 20 м. Папярочны ўхіл веладарожак прымаюць 15-25%.

4.5.5 Павароты веладарожак робяцца з радыюсам ня меншым за 5,0 м. На паваротах з радыюсам меншым за 5,0 м робяцца віражы згодна з табліцай 4.10. На скрыжаваньнях вуліц віражы на закругленьнях веладарожак ня робяцца.

Радыюс павароту, м	Хуткасьць руху, км/г	Ухіл віражу, %
5-10	10-15	30
10-20	10-15	20
20-50	10-20	15

Для часовага захоўваньня ровараў варта прадугледжваць стаянкі памерам 2×0,6 м на адзін ровар, падзеленыя стойкамі (скобамі) вышынёй 0,75 і даўжынёй 1,6 м.

Via «Горад раварыстаў»

Кароткі праваднік па менскіх веластаянках. Кальварыйская, 3

2010-06-29T01:40:00.001+03:00

Ля прадуктовай крамы ля выхаду з Фрунзэнскай на Кальварыйскай, 3 — новая колаўторквалка. Ня самая горшая сярод «суродзічаў». Праблема ў іншым: справа — падземны пераход, зьлева — падземны пераход. Раварысты звычайна такія зачараваныя мясьціны стараюцца аб’яжджаць. Ну але раней там увогуле не было дзе прыткнуцца.

Яшчэ адна велакропка на «Сьвелце»

2010-06-28T09:56:00.003+03:00

Велапракат адкрыўся ў двары гандлёвага павільёну на рынку «Сьвелта», пад адной шыльдай з салярыем. Месца зручнае, побач велабан (нармальнага зьезду на які ўсё-такі няма). Заадно і рамантуюць.

Сайт — veloprokat.by.

Малініна, 35А.

Яшчэ на «Сьвелце» ёсьць велакрама і стаянка.

Кароткі праваднік па менскіх веластаянках. Шэпічы

2010-06-25T13:12:00.000+03:00

Узорная колаўторквалка зьявілася ля праспэкта Ракасоўскага, 35.
Ровар не вісіць, кола ўлазіць, воська не чапляецца.
Адно трывожна — кожная стойка стаіць паасобку, прыкручаная двума нітамі. Зрэшты, перакусіць тросік пры жаданьні прасцей…

Ну і бардзюры перад крамай маглі б падсыпаць, раз стаянка ўжо.

Дзякуй Аляксандру Дзешчанку за наводку.

Кароткі праваднік па менскіх веладарожках. Цнянская Другая

2010-06-23T14:44:00.001+03:00

Слайды ва ўвесь экран

View Праваднік па менскіх веладарожках in a larger map

Фоткі ўраздроб

Кароткі праваднік па менскіх веластаянках. Опэра-балетная

2010-06-23T13:02:00.000+03:00

Плошча Парыскай камуны ў сквэры Траецкая гара =), 1.

Слайды на ўвесь экран

Фоткі ўраздроб

Злазь, прыехалі!

2010-06-23T12:28:00.000+03:00

Апдэйт да Цнянскай веладарожкі.

Роварам няма «Bigzz»’а

2010-06-22T16:45:00.003+03:00

(Сцэнка ў адной дзеі. Месца дзеяньня — Менск, Скрыжаваньне Лагойскага тракту і МКАД)

— А дзе ў вас можна ровары прыпаркаваць?

— Нідзе.

з.ы: Напісаў ліста

Шаноўнае спадарства!

З задавальненнем карыстаюся вашым гандлёвым цэнтрам і лічу яго адным з найлепшых у горадзе. Больш за тое, некаторыя тавары можна знайсці толькі ў вас. Але як карыстальнік веласіпеднага транспарту кожны раз пачуваюся нечаканым госцем.

Справа ў тым, што паставіць веласіпед ля вашага гіпермаркета няма дзе. Зусім.

Вялізная аўтамабільная стаянка — і ніводнага месца, каб прыткнуць ровар. Зразумела, што велапакупнікі не з’яўляюцца для вас прыярытэтнай аўдыторыяй (хоць могуць за раз увезці да 35 кг тавараў), але ў якасці ласкі можна было б паставіць стойку на 3-5 веласіпедаў.

Ахоўнікі адсылаюць прымацоўваць веласіпеды да металічных агароджаў калон, але стандартны U-замок мае вузейшы дыяметр, чым гэтыя агароджы. Трос, якім можна абхапіць гэтыя агароджы, лёгка перакусваецца. І як доказ гэтага, да вялікага жалю, «Biggz» ужо фігураваў у зводках крадзяжоў веласіпедаў.

Веластаянкі з’яўляюцца стандартам для гіпермаркетаў у еўрапейскіх краінах. Веластаянкі маюць і шэраг гандлёвых цэнтраў у нашай сталіцы, у тым ліку «Карона», «Гіпа», «Сталіца». Прычым, ля апошняга колькасць веламесцаў была нядаўна павялічана ў 3 разы з-за вялікай папулярнасці.

Непадалёк ад вашага гіпермаркета знаходзіцца веладарожка Мінск — Раўбічы, зона адпачынку з велатрасай ля Цнянскага вадасховішча. З’яўленне веластаянкі зробіць ваш магазін аб’ектам прыцягнення пры наяўнасьці ўжо гатовай велаінфраструктуры ў 5-15 хвілінах язды.

Навучыце паркаваць велік на аўтастаянцы, га?

2010-06-19T14:42:00.005+03:00